İlk F2F təhsil sərgisi uğurla keçirildi

Apply-Uni-nin təşkilatçılarından biri olduğu “Face-to-Face” təhsil sərgisi uğurla keçirildi. Tədbir beynəlxalq təhsil sahəsində fəaliyyət göstərən agentlikləri, universitet nümayəndələrini və potensial tələbələri bir araya gətirdi.

Sərginin ilk mərhələsində agentlik nümayəndələri iştirakçı universitetlərin təmsilçiləri ilə birbaşa görüşmək imkanı əldə etdilər. Görüşlər zamanı universitetlərin təhsil proqramları, qəbul qaydaları və mümkün əməkdaşlıq istiqamətləri barədə fikir mübadiləsi aparıldı. Bununla yanaşı, tədbirdə iştirak edən müxtəlif agentliklərin nümayəndələri də bir-biri ilə tanış olmaq, əlaqələr qurmaq və gələcəkdə birgə əməkdaşlıq imkanlarını müzakirə etmək imkanı əldə etdilər. Beləliklə, sərgi həm universitetlərlə agentliklər arasında əməkdaşlığın inkişafına, həm də təhsil sahəsində işgüzar əlaqələrin genişlənməsinə töhfə verdi.

Sərginin ikinci hissəsində potensial tələbələrlə universitet nümayəndələri arasında fərdi görüşlər keçirildi. Tələbələr maraq göstərdikləri universitetlərin nümayəndələri ilə birbaşa ünsiyyət quraraq təhsil proqramları, qəbul tələbləri, təqaüd imkanları, yaşayış şəraiti və onları maraqlandıran digər məsələlər barədə ətraflı məlumat əldə etdilər.

F2F təhsil sərgisinin əsas üstünlüklərindən biri görüşlərin əvvəlcədən planlaşdırılmış və fərdi şəkildə təşkil olunması idi. Tələbələr qeydiyyat zamanı görüşmək istədikləri universitetləri müəyyən edir, tədbir zamanı isə məhz seçdikləri universitetlərin nümayəndələri ilə ayrıca görüşürdülər. Hər görüşün müəyyən edilmiş vaxt çərçivəsində keçirilməsi sayəsində tələbələr öz suallarını rahat şəkildə ünvanlamaq, universitet nümayəndələri isə hər bir iştirakçı ilə ayrıca söhbət apararaq onu maraqlandıran məsələlərə ətraflı cavab vermək imkanı əldə edirdilər. Bu format sərgidə ümumi qarışıqlığın qarşısını alaraq hər bir görüşün daha rahat və nəticəyönümlü keçməsini təmin edirdi.

Tədbirin təşkilində əsas məqsəd iştirakçı sayından daha çox görüşlərin məhsuldar keçirilməsinə yönəldilmişdi. Bu isə həm iştirakçıların vaxtından səmərəli istifadə olunmasına, həm də universitetlərin öz proqramlarına maraq göstərən potensial tələbələrlə birbaşa və əyani şəkildə ünsiyyət qurmasına şərait yaratdı.

İlk F2F təhsil sərgisinin uğurla keçirilməsi bu formatda keçiriləcək növbəti tədbirlər üçün də başlanğıc oldu. Qarşıdakı aylarda fərqli universitetlərin iştirakı ilə yeni sərgilərin keçirilməsi planlaşdırılır. Başlıca hədəfimiz universitetləri, agentlikləri və potensial tələbələri bir araya gətirərək hər tədbirdə yeni əlaqələrin qurulmasına, əməkdaşlıq imkanlarının yaranmasına və tələbələr üçün ən uyğun universitet seçimi etməkdə onlara dəstək olmaqdır.

Sərgimizdən şəkillərlə tanış ola bilərsiniz